நீங்கள் தேடியது "குற்றால அருவிகள்"

தென்காசி:

நெல்லை மாவட்டத்தில் கடந்த வாரம் வெயில் சுட்டெரித்தது. இந்த நிலையில் கடந்த 2 நாட்களாக வெப்பம் குறைந்து ஆங்காங்கே மழை பெய்து வருகிறது. நேற்று முதல் இன்று காலை வரை அதிகபட்சமாக தென்காசியில் 41.5 மில்லி மீட்டர் மழையும், செங்கோட்டையில் 41 மில்லி மீட்டர், சிவகிரியில் 40 மில்லி மீட்டர், ஆய்க்குடியில் 39.4 மில்லி மீட்டர் மழையும் பெய்துள்ளது.

கருப்பாநதி அணை பகுதியில் 38 மில்லி மீட்டர், அடவிநயினார் அணை பகுதியில் 23 மில்லி மீட்டர், குண்டாறு 21 மில்லி மீட்டர், ராமநதி அணை பகுதியில் 18 மில்லி மீட்டர் மழையும் பெய்துள்ளது. நேற்று இரவு 7.30 மணி முதல் இரவு 9 மணி வரை சூறைக்காற்றுடன் பலத்த இடி- மின்னலுடன் தென்காசி, செங்கோட்டை, புளியரை, இலஞ்சி, கணக்கப்பிள்ளை வலசை பகுதியில் கனமழை கொட்டியது.

அப்போது குண்டாறு பாலம் அருகே உள்ள தேசிய நெடுஞ்சாலையில் பெரிய மரம் சரிந்து விழுந்தது. இதில் உயர் அழுத்த மின் கம்பங்கள் முறிந்து மின் கம்பிகள் அறுந்து சாலைகளில் விழுந்தன. இதனால் கொல்லம் தேசிய நெடுஞ்சாலையில் சுமார் அரை மணி நேரம் போக்குவரத்து பாதிக்கப்பட்டது. உடனடியாக மின் வாரிய அதிகாரிகள் மற்றும் போலீசார் விரைந்து செயல்பட்டு மின்சாரத்தை துண்டித்தனர். இதனால் உயிர் சேதம் ஏதும் ஏற்படவில்லை. போக்குவரத்து வல்லம் வழியாக மாற்று பாதையில் அனுப்பப்பட்டது.

பலத்த மழை காரணமாக குற்றாலத்தில் உள்ள அனைத்து அருவிகளிலும் இன்று தண்ணீர் நன்றாக கொட்டுகிறது. மெயின் அருவி, ஐந்தருவி, பழைய குற்றால அருவிகளில் இன்று நன்றாக தண்ணீர் விழுந்ததால், சுற்றுலா பணிகள் கூட்டம் அதிகரித்து காணப்பட்டது. வழக்கமாக மே மாதம் இறுதியில் தான் குற்றால சீசன் தொடங்கும். ஆனால் இந்த ஆண்டு ஏப்ரல் இறுதியில் கோடை மழை காரணமாக குற்றால அருவிகளில் தண்ணீர் கொட்டுவதால், சுற்றுலா பயணிகள் உற்சாகம் அடைந்துள்ளனர்.

இதுபோல நெல்லை மாவட்டத்தின் பிற பகுதியான கடனாநதி அணைப்பகுதியில் 10 மில்லி மீட்டர், சங்கரன் கோவிலில் 5 மில்லி மீட்டர், கண்ணடியன் கால்வாயில் 2.6 மில்லி மீட்டர், பாபநாசத்தில் 2 மில்லி மீட்டர், அம்பையில் 2 மில்லி மீட்டர், சேர்வலாறு 1 மில்லி மீட்டர் மழையும் பெய்துள்ளது. வறண்டு கிடந்த பாபநாசம் அணைக்கு மழை காரணமாக வினாடிக்கு 4.86 கன அடி தண்ணீர் வந்து கொண்டு இருக்கிறது. அணையின் நீர்மட்டம் இன்று காலை 16.85 அடியாக குறைந்த அளவில் உள்ளது. அணையில் இருந்து குடிநீருக்காக வினாடிக்கு 54.75 கன அடி தண்ணீர் திறந்து விடப்படுகிறது.

மணிமுத்தாறு அணைக்கு வினாடிக்கு 34 கன அடி தண்ணீர் வந்து கொண்டு இருக்கிறது. அணையின் நீர்மட்டம் இன்று காலை 76 அடியாக உள்ளது. சேர்வலாறு அணை நீர்மட்டம் 48.69, கடனாநதி-27.40, ராமநதி-25, கருப்பாநதி-31.20, குண்டாறு-11.62, அடவிநயினார்-15 அடிகளாகவும் நீர்மட்டம் உள்ளது.

இந்நிலையில் வங்க கடலில் ஏற்பட்டுள்ள காற்றழுத்த தாழ்வு மண்டலம் காரணமாக இலங்கையிலும், தென் தமிழகத்திலும் தொடர்ந்து மழைக்கு வாய்ப்புள்ளதாக வானிலை மையம் அறிவித்துள்ளது.#Rain

தென்காசி:

மேற்கு தொடர்ச்சி மலைப்பகுதிகளில் தொடர்ந்து பெய்துவரும் கன மழை காரணமாக குற்றாலம் அருவிகளில் வெள்ளப்பெருக்கு ஏற்பட்டுள்ளது. குற்றாலத்தில் அவ்வப்போது பெய்யும் கன மழையினால் அருவிகளில் வெள்ளப்பெருக்கு ஏற்பட்டுள்ளது.

கடந்த 4 நாட்களாக தொடர்ந்து அனைத்து அருவிகளிலும் வெள்ளம் சீறிப்பாய்கிறது. இதனால் சுற்றுலா பயணிகள் குளிக்க தடை விதிக்கப்பட்டு உள்ளது. இன்று 5-வது நாளாக அருவிகளில் வெள்ளப்பெருக்கு ஏற்பட்டுள்ளதால் மெயின் அருவி, ஐந்தருவி, பழைய குற்றாலம் அருவிகளில் குளிக்க தடை விதிக்கப்பட்டது. இந்த நிலையில் மலைப்பகுதியில் நேற்று இரவு மழை குறைந்த நிலையில் அதிகாலையில் இருந்து மீண்டும் மழை கொட்ட தொடங்கியுள்ளது.

இதன் காரணமாக மெயின் அருவியில் ஆர்ச்சை தாண்டி அதன் முன்புறம் உள்ள தடாகம் வரை தண்ணீர் ஆர்ப்பரித்து கொட்டியது. ஐந்தருவியிலும் அதிகமான வெள்ளப்பெருக்கு ஏற்பட்டது. இதேபோல் பழைய குற்றாலம் அருவி, புலியருவி ஆகியவற்றிலும் தண்ணீர் கொட்டியது.

புலியருவியில் வெள்ளப்பெருக்கு அதிகமாக இருந்ததால் அங்கும் சுற்றுலா பயணிகள் குளிக்க தடை விதிக்கப்பட்டது. தொடர் வெள்ளத்தால் குற்றாலத்துக்கு வரும் சுற்றுலா பயணிகள் எண்ணிக்கையும் குறைந்துள்ளது.

கன மழை காரணமாக குற்றாலம் சிற்றாற்றிலும் தொடர்ந்து வெள்ளப்பெருக்கு ஏற்பட்டுள்ளது. ஆற்றின் இருகரைகளையும் தொட்டபடி தண்ணீர் செல்கிறது. சிற்றாற்றில் உள்ள 17 தடுப்பணைகளும் நிரம்பி கால்வாய்களிலும் அதிக அளவு தண்ணீர் செல்கிறது. ஆற்றின் கரையோரபகுதி மக்கள் தொடர்ந்து பாதுகாப்பாக இருக்க அறிவுறுத்தப்பட்டுள்ளனர்.  #CourtallamFalls

தென்காசி:

ஒவ்வொரு ஆண்டும் ஜூன் மாதம் தொடக்கத்திலே குற்றாலத்தில் சீசன் ஆரம்பம் ஆகும். இந்த ஆண்டு மே மாத இறுதியிலேயே சீசன் தொடங்கியது. தொடர்ந்து குற்றாலம் மலைப்பகுதியில் கனமழை பெய்து வந்ததால் அருவிகளில் தண்ணீர் வரத்து அதிகரித்தது.

இதனால் சீசன் களை கட்டியது. இடையிடையே பலத்த மழை பெய்ததால் குற்றாலம் மெயினருவி, ஐந்தருவி உள்ளிட்ட அனைத்து அருவிகளிலும் வெள்ளப்பெருக்கு ஏற்பட்டது. இடையில் ஓரிரு நாட்கள் மட்டுமே அருவிகளில் தண்ணீர் குறைவாக உள்ளது. தொடர்ந்து கடந்த 2 மாதத்திற்கும் மேலாக சீசன் முழுஅளவில் உள்ளது. இந்த நிலையில் கடந்த 3 நாட்களாக குற்றாலம் மலைப்பகுதியில் இடைவிடாமல் மழை பெய்து வருகிறது.

இதனால் அருவிகளில் கடும் வெள்ளப் பெருக்கு ஏற்பட்டுள்ளது. குற்றாலம் மெயினருவி, ஐந்தருவி, பழையகுற்றாலம் அருவி, புலியருவி உள்ளிட்ட அனைத்து அருவிகளிலும் இன்று 4-வது நாளாக வெள்ளப்பெருக்கு ஏற்பட்டுள்ளதால் சுற்றுலா பயணிகள் குளிக்க தடை விதிக்கப்பட்டுள்ளது. இதனால் சுற்றுலா பயணிகள் ஏமாற்றம் அடைந்தனர்.

மெயினருவி, ஐந்தருவி ஆகிய பகுதிகளில் ஏராளமான போலீசார் பாதுகாப்புக்காக நிறுத்தப்பட்டுள்ளனர். தொடர்ந்து போலீசார் கண்காணிப்பில் ஈடுபட்டுள்ளனர்.

குற்றாலம் புலியருவியில் நேற்று முன்தினம் குளிக்க சென்ற வாலிபர் பலியான சம்பவத்தை தொடர்ந்து அங்கு சுற்றுலா பயணிகள் குளிக்க தடை விதிக்கப்பட்டுள்ளது. எனினும் புலியருவியில் விழுந்து வரும் ஓடை பகுதியில் வரும் தண்ணீரில் மட்டுமே சுற்றுலா பயணிகள் குளிக்க அனுமதிக்கப்பட்டுள்ளது. குற்றாலம் மெயினருவியில் இருந்து வரும் தண்ணீர் சிற்றாற்றில் சேருவதாலும், காட்டாற்று வெள்ளம் காரணமாகவும் சிற்றாறில் கடும் வெள்ளப்பெருக்கு ஏற்பட்டுள்ளது.

ஆற்றில் இருகரைகளையும் தொட்டபடி தண்ணீர் செல்கிறது. சிற்றாற்று கால்வாய்களிலும் அதிகளவு தண்ணீர் செல்கிறது. இதனால் சிற்றாற்றின் கரையோர பகுதிகளில் பொதுமக்கள் பாதுகாப்பாக இருக்க அறிவுறுத்தப்பட்டார்கள்.

சிற்றாற்று பாசன குளங்களில் உடைப்பு ஏற்படாமல் இருக்க அதிகாரிகள் பல்வேறு குழுக்களாக சென்று கண்காணிப்பில் ஈடுபட்டுள்ளனர். #Courtallam

தென்காசி:

தென்மேற்கு பருவமழை தீவிரம் அடைந்ததை தொடர்ந்து மேற்கு தொடர்ச்சி மலைப்பகுதியில் மழை பெய்து வருகிறது. குற்றாலத்தில் ஆண்டுதோறும் ஜூன் மாத தொடக்கத்தில் இருந்து ஆகஸ்டு மாதம் இறுதி வரை சீசன் இருக்கும். இந்த ஆண்டு மே மேத இறுதியிலேயே சீசன் தொடங்கியது. தொடர்ந்து வழக்கத்தை விட சீசன் ரம்மியமாக உள்ளது. இதனால் சுற்றுலா பயணிகள் மகிழ்ச்சி அடைந்துள்ளனர்.

மலைப்பகுதியில் அவ்வப்போது கன மழை பெய்வதால் அருவிகளில் வெள்ளப்பெருக்கு ஏற்பட்டு வருகிறது. நேற்று குற்றாலம் மெயினருவி, ஐந்தருவியில் தண்ணீர் ஆர்ப்பரித்து கொட்டியது. இந்த நிலையில் நேற்று இரவு முதல் குற்றாலம் மலைப்பகுதியில் கன மழை பெய்து வருகிறது. இதனால் குற்றாலம் மெயினருவியில் நள்ளிரவு வெள்ளப்பெருக்கு ஏற்பட்டது.

இன்று காலையும் தொடர்ந்து வெள்ளப்பெருக்கு ஏற்பட்டதால் சுற்றுலா பயணிகள் குளிக்க தடை விதிக்கப்பட்டது. இதேபோல் ஐந்தருவி, பழைய குற்றால அருவிகளிலும் வெள்ளப்பெருக்கு ஏற்பட்டதால், அங்கும் குளிக்க தடை விதிக்கப்பட்டது. இதை தொடர்ந்து போலீசார் கண்காணிப்பு பணியில் ஈடுபட்டு உள்ளனர்.

குற்றாலத்தில் இன்று வழக்கத்தை விட சுற்றுலா பயணிகள் கூட்டம் அதிகமாக காணப்பட்டது. அருவிகளில் வெள்ளம் காரணமாக அவர்கள் குளிக்க முடியாமல் ஏமாற்றம் அடைந்தனர். புலியருவி, சிற்ற‌ருவி ஆகிய 2 அருவிகளிலும் மிதமான தண்ணீர் விழுவதால் அங்கு சுற்றுலா பயணிகள் குளிக்க அனுமதிக்கப்ப‌ட்டனர். இதனால் சுற்றுலா பயணிகள் அந்த அருவிகளுக்கு படையெடுத்தனர். வெள்ளம் சற்று குறைந்தாலும் குளிக்க அனுமதி கிடைக்கும் என சுற்றுலா பயணிகள் அருவிக்கரையில் காத்து நின்றனர்.

தொடர்ந்து குற்றாலம் மலைப்பகுதியில் கன மழை பெய்து வருகிறது. தொடர் மழை காரணமாக குற்றாலம் சுற்றுப்பகுதியில் உள்ள குளங்களும் நிரம்பியுள்ளன.  #courtallam